हवाई सेवा प्रदायक र नियमनकारी निकायसम्बन्धी दुई विधेयक संसदमा पेश गर्ने मन्त्रीपरिषद्काे निर्णय

काठमाडाैँ । सरकारले हवाई सेवा प्रदायक र नियमनकारी निकायलाई अलग–अलग गर्ने गरि तयार गरिएका दुई विधेयकहरुलाई संसदमा पेश गर्ने निर्णय गरेको छ ।

आइतबार सिंहदरबारमा पुष ५ गते बसेको मन्त्रिपरिषद् बैठकका निर्णय सार्वजनिक गर्दै सरकारका प्रवक्ता पृथ्वीसुव्वा गुरुङले नेपाल हवाई सेवा प्राधिकरणको स्थापना र व्यवस्था गर्न बनेको विधेयक र नेपाल नागरिक उड्डयन प्राधिकरणसम्बन्धी कानूनलाई संशोधन र एकीकरण गर्न बनेको विधेयकलाई संघीय संसदमा पेश गर्न स्वीकृति दिने निर्णय भएको जानकारी दिए ।

बैठकले प्रधानमन्त्री तथा मन्त्रिपरिषद् कार्यालयको परिमार्जित कार्यविवरण स्वीकृत गरेको छ भने कान्ति बाल अस्पताल बिकास समितिको अध्यक्ष पदमा श्रीराम सुवेदीलाई मनोनयन गर्ने निर्णय गरेको छ । त्यस्तै साना तथा मझौला संगठित संस्थाको धितोपत्र निष्कासन तथा कारोवार नियमावली २०८१ बनाउन नेपाल धितोपत्र बोर्डलाई स्वीकृति दिने निर्णय गरेको प्रवक्ता गुरुङले बताए । 

सो क्रममा प्रवक्ता गुरुङले मुलुकमा आर्थिक लगाएतका धेरै समस्या देखिएका कारण ठूला दल मिलेर स्थायीत्वका लागि सरकार बनाउनुपरेको बताए । 

राष्ट्रिय राजनीतिकको अस्थीरता अन्त्य गर्दैै मुलुकको समृद्धि र बिकासमा सरकारको ध्यान रहेको उनले बताए । गुरुङले वर्तमान सरकार बनेको प्रति केहिलाई चित्त नबुझेकाले बिभिन्न भ्रम छर्ने कोशीस भइरहेको जिकिर गरे । 

उनले वर्तमान सरकार कुनै पनि हालतमा नढल्ने बताए । गुरुङले ८४ सम्म दुई दल मिलेर सरकार बनाउने र त्यसपछि ठूला दलहरु नै प्रतिष्पर्धामा उत्रने धारणा राखे ।